Yaxşı oyun izlədik. Hər iki komanda layiqli mübarizə apardı. Bizi səfərdə nəyin gözlədiyini bilirdik. Bu gün şanslı tərəf biz olduq. Penalti epizoduna gəldikdə, hakimlərin qərarını heç vaxt müzakirə etmək istəməmişəm. Bakıdakı oyunda da bizim xeyrimizə penalti təyin edilməli idi, amma bunu etmədilər. Biz də bunu qabartmadıq. Oyunun "qırılma nöqtəsi" isə penalti epizodu deyildi.

Axar.az xəbər verir ki, bunu “Araz-Naxçıvan”ın baş məşqçisi Elmar Baxşıyev “Aris”lə oyundan sonra mətbuat konfransında deyib.

“Aris”in oyununu da vurğulamaq lazımdır. Yaxşı, təşkilatlanmış komandadır. Bakıdakı oyunda da geridönüşü futbolçularım etdilər. Hər iki oyunda “Araz-Naxçıvan” meydanda yaxşı işlər gördü. Bu cür mərhələlər iki oyundan ibarətdir. Deyirsiz ki, iki epizodumuz oldu və hər ikisini dəyərləndirdik. Bunlar futbolun elementləridir. Bakıdakı oyuna baxsaq, epizodları hesablasaq, 5:1 hesabı ilə qalib gəlməli idik. Komanda şəklində yaxşı, layiqli mübarizə apardıq. Yolumuza davam edirik”, - E.Baxşıyev bildirib.

Qeyd edək ki, "Araz-Naxçıvan" “Aris”ə iki oyunun nəticəsinə əsasən, 4-3 qalib gələrək, UEFA Konfrans Liqasının III təsnifat mərhələsində Kiprin "Omoniya" klubuna rəqib olub.