Dağıstan Respublikasından gələn boksçular Xabarovskda alışıb-yanan tramvayda qalmış onlarla sakinin həyatını xilas ediblər.

Bu ərəfədə boksçular bu uzaq şərq şəhərinə Rusiya Çempionatında iştirak etmək üçün gəliblər.

"Axar.az" Rusiya mətbuatına istinadən xəbər verir ki, tramvayın sürücüsü kabinə od tutan kimi qapıları açmadan öz canını götürüb qaçıb. Salonda qadınlar və uşaqlar köməksiz qalıblar.

Yanan tramvaydan sərnişinlərin xilas edilməsi haqda yerli 6TV kanalında boks üzrə idman ustası Hacımurad Həsənov xəbər verib. O özü də xilasetmədə iştirakçı olub. Hacımurad hadisəni belə danışıb:

"Hay-küy düşdüyünü görüb heç nə düşünmədən oraya doğru qaçdıq. Yumruqlarımız, ovcumuzla şüşələri döyəclədik, alınmadı, daş götürdük".

Dağıstan boksçularının Xabarovsk vətəndaşlarını xilas etməsi ilə bağlı keçirilən mətbuat konfransında meriya rəhbərliyi göstərdikləri qəhrəmanlığa görə idmançılara təşəkkür edib və onlara fərmanlar verib.