Azərbaycanlı iş adamı, "Bakı" FK-nın prezidenti Hafiz Məmmədovun uzun müddətdir müzakirəsi gedən və alğı-satqısı barədə dəfələrlə xəbərlərin verildiyi İngiltərənin "Şeffild Uensdey" klubunu aldığı nəhayət ki təsdiqlənib.

Bu haqda klubun rəsmi saytında klub prezidenti Milan Mandariç məlumat verib.

ANS-in xarici mediaya istinadla yaydığı xəbərdə serbiyalı milyarderin 50 milyon avro müqabilində klubun səhmlərini Hafiz Məmmədova satdığı qeyd olunur.

Hafiz Məmmədov, həmçinin bu il Fransanın I Liqasında mübarizə aparacaq "Lans" klubunun da sahibidir.

Xatırladaq ki, H.Məmmədovun İngiltərənin "Şeffild Uensdey" klubunu alması barədə xəbər 2 ay öncə yayılmışdı. Həmin vaxt danışıqlar aparıldığı və artıq razılaşma əldə olunduğu qeyd edilirdi. İngiltərə mediasının bank hesabında 2 milyard nəğd pul olduğu barədə bilgi verdiyi Hafiz Məmmədovun alğı-satqını reallaşdıracağına şübhə edilmirdi.

"Şeffild Uensdey" klubunun ("Bayquşlar") uğur qazanma şansı isə o qədər də yüksək qiymətləndirilmir.