Mayın 16-da Moskvada Rusiya Mərkəzi Ordu İdman Klubunun idman zalında hərbçilər arasında güləş üzrə 33-cü dünya çempionatının kişilər arasında final görüşləri keçirilib.

Axar.az xəbər verir ki, Azərbaycan idmançılarından döşək üzərinə ilk olaraq MOİK-in üzvü Sona Tumarxanova çıxıb. Əlli kiloqram çəki dərəcəsində mübarizə aparan idmançımız Monqolustan güləşçisi N.Azjarqala 12:1 hesabı ilə qalib gələrək çempionatda üçüncü yeri tutub. İdmançımız bununla da çempionatda milli komandamızın aktivinə ilk medalı yazdırıb.

Kişilər arasında yarışda Azərbaycan idmançılarından döşək üzərinə MOİK-in zabiti Ağahüseyn Mustafayev çıxıb. 65 kiloqram çəki dərəcəsində mübarizə aparan güləşçimiz İran idmançısı Biyabani Peymana qalib gələrək çempionatda bürünc medal qazanıb.

Hərbçi güləşçilərimizin dünya çempionatında üçüncü medalını Coşqun Əzimov qazanıb.

Mərkəzi Ordu İdman Klubunun (MOİK) üzvü bürünc medal uğrunda görüşdə Macarıstan təmsilçisi Lukas Botondu 10:0 hesabı ilə məğlub edərək təmiz qələbə qazanıb.