"Hədəfimiz bəllidir! Bu, Avroliqanın qrup mərhələsidir". Apasport.az saytının məlumatına görə, bunu "Partizan"ın baş məşqçisi Marko Nikoliç deyib.

"Neftçi"nin Avroliqanın pley-off mərhələsində rəqibi olan "Partizan" sabah Bakıya gələcək. Belqrad klubu ölkəmizə gəlməzdən öncə "Partizan" stadionunun konfrans zalında yerli jurnalistlərin suallarını cavablandırıb.

Nikoliç "Neftçi"nin zəif cəhətlərini bildiyini desə də, bunları açıqlamağı lazım bilməyib: "Biz səviyyəli rəqibə qarşı oynayacağıq. Onlara qarşı oynamaq çox asan deyil, rəqib bütün zonalarda mübarizə aparmağı sevir... Ancaq biz yalnız öz oyunumuzu göstərmək istəyirik. "Neftçi"nin öz zəif tərəfləri var. Mətbuat konfransında həmin zəif cəhətləri açıqlamağımız düzgün olmaz. Səbirsizliklə cavab matçında əla atmosferdə oynamağımızı gözləyirəm. İki nəticə bizi istəyimizə çatdıracaq: heç-heçə və qələbə. Biz qalib gəlməyə hazırlaşırıq. Dekabrdan bu yana bir oyun da uduzmamışıq. Sidq ürəklə inanıram ki, biz Bakıda da məğlub olmayacağıq".

35 yaşlı çalışdırıcı ilk 10-15 dəqiqə ərzində "Ludoqorets" və "Neftçi" ilə Belqraddakı matçlarda olduğu kimi, 2 top buraxmamağa çalışacaqlarını söyləyib: "Biz Bolqarıstanda olduğu kimi taktiki cəhətdən intizamlı oynaya bilərik. Bunu "Neftçi" ilə Belqraddakı matçda da edə bilərdik. Amma öz çatışmazlıqlarımızı bilirik. Bizim evdə oynadığımız matçlarda 2 top buraxdıq. İndi isə səfərdə oynayacağıq. Narahatlıq olur, ilk 10-15 dəqiqə ərzində bunu aradan qaldırmaq lazımdır. Matçlar 90 dəqiqə oynanılır. Ona görə də sona kimi mübarizə aparmaq lazımdır. Biz ciddi oynamağa hazırıq. Fikrimcə, əsəbilik geridə qalıb".

Qeyd edək ki, "Neftçi" – "Partizan" cavab oyunu avqustun 28-də saat 21:00-da keçiriləcək.