Azərbaycan Premyer Liqası yeni fenomenlə hamını təəccübləndirməkdədir.

Axar.az xəbər verir ki, gənc heyət və gənc baş məşqçiyə malik olan gənclər şəhərinin komandası "Sumqayıt" çempionatda liderliyə yüksəlib. Futbolçu yetişdirməklə holland "Ayaks"ını xatırladan "Sumqayıt" komandası heç zaman ciddi nəticəyə nail ola bilməyib. Amma bu mövsümə böyük enerji ilə başlayan gənclər birinciliyi ələ keçiriblər.

Komanda 12 xalla çempionatın lideri statusuna malikdir. Gənc çalışdırıcı Aqil Məmmədovun başçılığı altında əzmkarlıq nümayiş etdirən "Sumqayıt" belə davam edərsə, "Qarabağ" presedentini təkrarlaya bilər. Komanda eynilə "Qarabağ" kimi ciddi nəticəyə can atır. Aqil Məmmədov da Qurban Qurbanov kimi gənc mütəxəssis olaraq nailiyyət qazanmaq, komandasını Avropaya çıxarmaq istəyir. İdman ekspertləri hesab edirlər ki, bu templə davam etsə, "Sumqayıt" hamını şoka sala, çempion ola və sensasiya yarada bilər.

Qeyd edək ki, Azərbaycan Premyer Liqasında 5-ci tura yekun vurulub. Son oyun günündə daha bir qarşılaşma keçirilib. "Bakı" öz meydanında yeni mövsüm uğurlu çıxışı ilə diqqət çəkən "Sumqayıt"ı qəbul edib. Sumqayıt təmsilçisi bu görüşdə hesabda geridə olsa da, sonradan iki qol vuraraq qalib gəlib. Bu qələbə sayəsində onlar yenidən liderliyə yüksəlib.

"Bilirdik ki, çox çətin olacaq. Mübariz komandaya qarşı oynadıq".

Bu sözləri "Sumqayıt"ın baş məşqçisi Aqil Məmmədov oyun haqda danışarkən deyib. O, daha sonra bildirib:
"İlk hissədə komandamdan razı qalmadım. İkinci hissədə isə toparlandıq və lazımı nəticəni əldə etdik. Bu oyunda azarkeşlərin də dəstəyini hiss elədik. Oyunun gedişində zədə alan Slavik Alxasovun zədəsi ciddi deyil.

Yaxın günlərdə komandaya qoşulacaq".