"Bizi Kiyevdə çətin bir oyun gözlədiyini bilirdik. Çünki rəqibimiz hazırda Ukrayna çempionatının lideridir. "Dnepr" son oyunlarda çox yaxşı təsir bağışlayır. Biz də buna uyğun hazırlaşmışdıq. Demək olar ki, Qurban müəllimin verdiyi tapşırıqların öhdəsindən gəldik. Rəqibin oyununa mane olmaqla istədiyimizi etdik".

Axar.az-ın məlumatına görə, bu sözləri "Dnepr"lə matçda yeganə qolun müəllifi olan "Qarabağ"ın makedoniyalı yarımmüdafiəçisi Muarem Muarem deyib. Klubu qələbəyə daşıyan qola imza atan Muarem qol.az-a müsahibəsində bildirib ki, bu qolda komanda yoldaşlarının zəhməti ondan az deyil: "Bütün futbolçularımız 90 dəqiqə əzmkar mübarizə apardı.

"Məncə, "Dnepr"in qapısına vurulan qolu bütün komandanın adına yazmaq lazımdır. Bunu ayrıca dəyərləndirməyə ehtiyac yoxdur. Ancaq qarşıda üç oyunumuz var. "İnter" və "Dnepr"lə evdə, "Sent Etyen"lə səfərdə oynayacağıq. Hər üç matçdan maksimum nəticə qazanmalıyıq".