Bu gün Topaz Premyer Liqasında IX turun növbəti görüşləri keçirilib.

Axar.az xəbər verir ki, paytaxtda keçirilən AZAL - "Bakı" qarşılaşmasında ikincilər 1-0 hesablı qələbəyə sevinib.

Hafiz Məmmədova məxsus "Bakı klubu bununla da ardıcıl 3-cü qələbəsini qazanaraq turnir vəziyyətindəki mövqeyini bir qədər yaxşılaşdırıb. "Bakı" klubunun baş məşqçisi matçla bağlı bunları deyib:

"Mən bu gün meydançada sona qədər mübarizə aparan futbolçularımı təbrik edirəm. Oyunçularım bu gün inanılmaz dərəcədə istəkli idilər. Biz qələbəni istədik, arzuladıq. İstədiyimiz işləri həyata keçirə bilərik. Biz təlim-məşq toplanışı belə keçirməmişik. Amma futbolçularım əsl kişilik göstərirlər. Bütün qələbələr futbolçularımın xarakter göstərməsi ilə bağlıdır. Mən qələbəni yenə rəhbərliyə həsr edirəm. Biz daha yaxşı yerlərə gəlməyə çalışırıq. Oyunları çirkinləşdirmirik. Rəqiblə başabaş mübarizə aparmağa çalışırıq".

Qeyd edək ki, bu turun dünən keçirilən qarşılaşmasında "Qəbələ" "Sumqayıt"ı 3-1 yenib. Bu gün Zaqatalada keçirilən "Simurq" - "Araz" görüşü isə birincilərin 4-0 qələbəsi ilə başa çatıb.