İspaniya Peşəkar Futbol Liqası 2013-2014-cü il mövsümünün ən yaxşılarını seçib.

Axar.az xəbər verir ki, "Real Madrid"in portuqaliyalı ulduzu Kriştiano Ronaldo 3 mükafata sahib olub.

Madriddə təşkil olunan mərasimdə 3 mükafatı birdən alan Ronaldo daha bir rekorda imza atıb. Belə ki, ilin "Ən yaxşı oyunçusu", ilin "Ən yaxşı qolu" və ilin "Ən yaxşı hücumçusu" nominasiyaları üzrə bütün rəqiblərini geridə qoyub.

Sevincini jurnalsitlərlə bölən məşhur futbolçu qərardan razı qaldığını bildirib:

"Ən yaxşı qol vurduğuma görə şadam. Komanda yoldaşlarıma təşəkkür edirəm. Bu qürurvericidir. Ən yaxşı hücumçu seçilməyim isə haqlı qərar idi. Artıq nə deyəcəyimi bilmirəm. Bu son mükafat deyilmi? Çox yaxşı. Mükafata het-trik etdim. Çox gözəl bir gecə oldu".

Mərasimdə başqa nominasiyalar üzrə də mükafatlar təqdim olunub. "Ən yaxşı qapıçı" mükafatını keçən mövsüm "Levante"nin formasını geyən və "Real Madrid"ə transfer olunan Keylor Navas, "Ən yaxşı müdafiəçi" nomimasiyası üzrə "Atletiko Madrid"in formasını geyən və hazırda İngiltərənin "Çelsi" klubunda top qovan Filipe Luis və Sergio Ramos ("Real Madrid") qazanıb.

"Ən yaxşı yarımmüdafiəçi" nominasiyası üzrə Luka Modriç ("Real Madrid"), "Ən yaxşı hücumameylli yarımmüdafiəçi" nominasiyası üzrə Andres İniesta ("Barselona") mükafata layiq görülüb.