İş adamı, "Hafka" ləqəbli Hafiz Məmmədov komandası üçün qollarını çırmalayıb. H.Məmmədov prezidenti olduğu "Bakı" klubunun maddi sıxıntınlarını aradan qaldırmaq, komandanın Premyer Liqadakı mövqeyini yaxşılaşdırmaq istiqamətində addımlar atmağa başlayıb.

Axar.az-a klubdakı yaxın yetkilidən verilən xəbərə görə, uzun müddətdir Hafkanın Azərbaycanda işləri yaxşı getmirdi. Onun biznes rəqabətində müəyyən qüvvələr tərəfindən sıxışdırılması, hər nə qədər etiraf etməsə də, fəaliyyətinə ciddi təsir göstərərək "Bakı"nın da çıxışına, maddi çətinliklərin meydana gəlməsinə səbəb olub.

Gələn son məlumatlar ondan xəbər verir ki, Hafka münasibətlərdə yaranmış müəyyən anlaşmazlıqlarını yoluna qoyub və klubun irəliləməsi üçün inqilabi sıçrayışa gətirib çıxaracaq addımlar atmağı planlaşdırır.

Mətbuatda yayılan məlumatlarda da futbolçulara əmək haqlarının hissə-hissə ödənilməyə başlandığı yer alıb. O da bildirilir ki, "Bakı"ya olan 7 milyon borc ödəniləcək, "Lans"a ödənəcək 2.5 milyon avro da hesaba köçürüləcək.

Hazırda milli çempionatda axırdan 3-cü olan "Bakı" klubunun liqanın yekununda ilk beşliyə salınması qarşıda hədəf kimi qoyulub. Hafkanın komandasını seytnot vəziyyətindən çıxara biləcəyini söyləmək isə zamanın işidir.