Mayın 29-da təxminən 1 milyard insanın diqqəti Bakıda keçiriləcək Avropa Liqasının final matçında olacaq. Sosial şəbəkələrdə bəzi ictimai-siyasi fəallar ölkəmizdə baş tutacaq bu tədbirin olduqca böyük və mötəbər olduğunu bildirərək, bunun Respublika Günümüzlə üst-üstə düşməsini nəzərə almağı təklif ediblər. Belə ki, onlar dünyaya 101 illik tariximizlə bağlı mesaj vermək üçün tədbir çərçivəsində stadionda hansısa bir aksiya, fləşmob və yaxud qısa video-çarx təqdim etməyin münasib olduğunu bildiriblər.

Məsələyə münasibət bildirən AFFA-nın mətbuat və ictimaiyyətlə əlaqələr şöbəsinin müdiri Firuz Abdulla Axar.az-a bildirib ki, UEFA öz bayrağı altında keçirilən oyunlarda siyasi şüarların səslənməsini və yaxud siyasi təbliğat aparılmasını birmənalı şəkildə qəbul etmir:

“Avropa Liqasının final matçını Azərbaycan deyil, UEFA keçirir. UEFA-nın idmanın siyasətdən uzaq olması barədə öz yanaşması var. Bu səbəbdən inanmıram ki, UEFA Bakıda keçiriləcək final matçında belə bir şeyə icazə versin”.