Bir həftə əvvəl qrim edərək kişi şəklində Tehranın “Azadi” stadionuna daxil olduqları üçün həbs edilən “Azadlıq qızları”ndan 4-ü azadlığa buraxılıb.

Axar.az xəbər verir ki, Zəhra Xoşnəvaz, Leyli Mələki, Hədiyyə Mərvəsi və Furuq Əlayidir adlı xanım azarkeşlər girov qarşılığında müvəqqəti olaraq sərbəst buraxılıblar.

Qərçək zindanında saxlandıqları müddətdə psixi təzyiqə məruz qalan qızların həm də təhdid edildiyi bildirilir. Onların səhhəti barədə hər hansı bir məlumat yayılmayıb.

Həmin vaxt həbs edildiyi bildirilən daha iki qızın taleyi bəlli deyil.

Xatırladaq ki, avqustun 12-də futbol yarışlarını yaxından izləmək üçün qrim edərək saqqal qoyan və gizli şəkildə Tehranın “Azadi” stadionuna daxil olan qızlar ETTELAAT əməkdaşları tərəfindən həbs edilərək, Qərçək zindanına aparılmışdılar.