Ermənistan komandası "Ulises"ə keçidi gündəmdə olan, sonda transferi baş tutmayan Şamil Qurbanov "Sportinfo.az"a danışıb. Millimizin keçmiş üzvü deyib ki, indiki vəziyyətdə Azərbaycandan təklif alsa, getməyəcək:

"Çünki hazırkı durum elə də yaxşı deyil. Baş vermiş hadisəni deyirəm. Mənə Türkiyədə olanda o qədər adam yazdı, elə şeylər yazdılar ki... Axırda bezdim, heç kimə cavab vermədim. Mən sadə futbolçuyam. Heç bir diplomatik söhbətlərlə əlaqəm ola bilməz".

Ş.Qurbanov Ermənistana transfer istəyinin səbəbini də açıqlayıb:

"İstədim ora gedəm ki, altı ay "Ulises"də oynayım və Çempionlar Liqasına çıxaq. Oradan da özümü yaxşı göstərib, Avropaya və ya Rusiyaya yaxşı klublara gedəm. Ancaq elə söhbətlər ortaya çıxdı ki, axırda getmək istəmədim. Başa düşürəm, bu iki ölkə arasında konflikt var. Ümid edirəm ki, hər şey yaxşı bitəcək".

Xatırladaq ki, Ş.Qurbanov Azərbaycan millisində oynasa da, azərbaycanlı olmadığını bildirmişdi.