"Qarabağ" Avropa Liqasının qrup mərhələsində İtaliya "İnter"i ilə oyununda üzləşdiyi hakim qərəzi ilə əlaqədar UEFA-nın Apelyasiya Komitəsinə müraciət edəcək. Bu barədə Sportnet.az-a klubun vəkili Qürur Qaye Günal məlumat verib.

Onun sözlərinə görə, UEFA-nın Etika və Nizam-İntizam Komitəsi şikayətə baxılmama səbəbini artıq açıqlayıb. Avropa futbol qurumundan bildirilib ki, ofsaydı dəyərləndirmək hakimin səlahiyyətindədir. Üstəlik, matçın 48 saniyə erkən bitməsinə dair dəlil yoxdur.

Günal buna cavab olaraq deyib: "Hamımız birgə videonu izləyək. Qol epizodundan sonra oyun davam etdirilibmi? Video qeydlərindən də aydın dəlil nə ola bilər? Deyəsən, UEFA bizimlə eyni matçı seyr etməyib".

Qeyd edək ki, "İnter"lə Tofiq Bəhramov adına Respublika stadionunda keçirilmiş matçın 90+4-cü dəqiqəsində "Qarabağ"ın yarımmüdafiəçisi qaydalar çərçivəsində qol vurub. Lakin çexiyalı baş hakim Miroslav Zelinka həmin epizodda ofsayd olduğunu iddia edərək, qolu saymayıb.