Futbol üzrə Azərbaycan millisinin baş məşqçisi Robert Prosineçki bu gün axşam "Barselona" və "Real Madrid" arasında keçiriləcək oyunla bağlı fikirlərini bölüşüb.

AzərTac xəbər verir ki, hər iki klubda yarımmüdafiəçi oynamış R.Prosinecki goal.com saytına bildirib ki, bu oyun dünyanın ən yaxşı komandalarının qarşılaşmasıdır, bu bir derbidir: "Bu o deməkdir ki, indi yaxşı oynayan "Barselona" uduza, ya da çətin günlərini yaşayan "Real Madrid" qələbə qazana bilər. Belə oyunlarda əvvəlcədən heç nə bilmək olmur".

Məşqçinin sözlərinə görə, bu oyunun nəticəsi İspaniya çempionatının gedişatını dəyişə bilər. "Barselona" ilk əvvəl böhranda idi. Onların bir sıra problemləri var idi, həmçinin bunlardan biri Messi ilə bağlı olmuşdu. Lakin sonradan onlar bir-birinin ardınca qələbə qazanmağa başladılar", - deyə o qeyd edib.

Xatırladaq ki, bu gün axşam "Real Madrid" və "Barselona" klubları "Kamp Nou" stadionunda 230-cu görüşünü keçirəcək. Oyun Bakı vaxtı ilə saat 00.00-da başlayacaq.