"Bu gün qalib gəldik. Ayağım "Neftçi"yə düşərli oldu".

Axar.az xəbər verir ki, bu sözləri "Neftçi"nin Müşahidə Şurasının yeni sədri Çingiz Abdullayev Azərbaycan Premyer Liqasının 27-ci turunda "Bakı"ya qalib gəldikləri matçdan (2:0) sonra jurnalistlərə deyib.

O, "Neftçi"də dəyişikliklərin olacağını vurğulayıb:

"Ancaq indidən hansı dəyişikliklərin olacağını söyləyə bilmərəm. Gərək bununla bağlı müzakirələr aparaq, peşəkarlarla danışaq. Mən axı futbolçu deyiləm. Təbii ki, "Neftçi"də mütləq dəyişikliklər olacaq. Amma bununla bağlı hələlik tam məlumat verə bilmərəm. Bir aya hazırlaşacağıq".

Ç.Abdullayev "Neftçi"də aparılacaq struktur dəyişikliyi barədə suala da cavab verib:

"Daha sonra yeniliklər barədə danışacağıq. İndidən hansısa struktur dəyişikliyi haqda danışmaq ciddi olmaz".
Bununla belə o bildirib ki, klubda köklü islahatlar olacaq: "Neftçi"də hər şey dəyişəcək".

Ç.Abdullayev Azərbaycan kubokunun yarımfinal mərhələsində uğurlu çıxış edəcəklərinə inandığını da söyləyib.