"Azərbaycanda bu gün peşəkar futbolçu görmürəm. Yoxdu belə futbolçu. Pul onları kor edib. İndi bizneslə məşğul olmağa icazə də verirlər. Qazanılan bu pul bir gün tükənib gedəcək. Amma sənin öz peşən olmalıdır".

Axar.az xəbər verir ki, bu sözləri veteran futbolçu, tanınmış idman jurnalisti Çingiz İsmayılov apasport.az-a geniş müsahibəsində deyib. 80 yaşlı mütəxəssis futbola marağın olmamasından narahatdır:

"O gün bir nəfərlə söhbət edirəm. Deyir ki, camaatın stadiona getməməyinin günahkarı kompüterdi, televizordur. Dedim, bəyəm Rusiyada, İtaliyada, İngiltərədə kompüter, televizor yoxdur? Çempionlar Liqasının oyununa baxıram, görürəm ki, ata-ana 5 yaşlı uşağı ilə stadiondadır. Onlar istirahət etməyə gəlirlər. Amma bizdə təbliğat zəifdir.

Bizim kanallar Azərbaycan futbolunu təbliğ edir? Baxırsan, bizə xas olmayan idman növlərini göstərirlər. Ağır daşları götürüb aparanları, öküz döyüşlərini göstərirlər. Biz onları inkişaf etdirəcəyik? Mən nadir hallarda müəllif verilişləri görürəm. Orda başqa şey deyirlər, çıxanda başqa. Pul çoxlarının gözünü yumub".