FİFA İspaniyanın iki nəhəng klubu – "Real Madrid" və "Atletiko Madrid" klubuna cəza tətbiq edib.

Axar.az xəbər verir ki, qurumun qərarına əsasən, paytaxt Madridin iki nüfuzlu komandası iki mövsüm transfer reallaşdıra bilməyəcək.

Ölkənin "Cadena Ser" radiosunun iddiasına görə, FİFA "Atletiko Madrid" klubuna tətbiq olunan cəzanı İspaniya Futbol Federasiyasına bildirib və yaxın günlərdə rəsmi qaydada təqdimat veriləcək. Cəzaya səbəb isə klubun idman məktəblərində çinli futbolçular olub.

Madridin "Real" klubuna gəlincə isə, FİFA 12 yaşında 4 futbolçunun müqaviləsində pozuntu olduğunu irəli sürüb. Bundan başqa klub vaxtından əvvəl transfer etməkdə günahlandırılır. Belə ki, Çempionlar Liqasının son qalibinin Marko Asensio (3,7 milyon avro qarşılığında "Malyorka"dan), Danilo (31 milyon avro qarşılığında "Porto"dan), Lukas Silva (15 milyon avro qarşılığında "Cruzeyro"dan) və Martin Odeqaardı (2 milyon avro qarşılığında "Stromqodset"dən) transfer etdiyi iddia olunur. Kral klubu ayrıca "Mançester Yunayted"dən qapıçı David de Xeyanı transfer etmək üçün də cəld hərəkətə keçib.