"Mən fikirləşirəm ki, Azərbaycan yaxşı sınaq oyunu keçirdi".

Apasport.az-ın məlumatına görə, bu sözləri Serbiya ilə hazırlıq oyunundan sonra Azərbaycan milli komandasının baş məşqçisi Robert Prosineçki deyib.

Komandanın birinci hissədə yaxşı oynadığını xüsusi vurğulayan xorvat mütəxəssis fərdi ustalığın nəticəni həll etdiyini qeyd elədi:

"Serbiya millisinin oyunçularının hamısı Avropa klublarında oynayırlar. Fərdi ustalıq öz sözünü dedi. İki qolu künc zərbəsindən, iki qolu isə uzaq məsafədən buraxdıq. Ümumi oyuna gəlincə isə ilk hissədən razı qaldım. Biz çox işləməliyik ki, Serbiya səviyyəsində futbol oynayaq".

Norveçlə oyun haqqında da fikir bildirən baş məşqçi toplanışın istənilən səviyyədə getdiyini dedi:

"Toplanışdan razıyıq. Norveçlə oyun üçün daha ciddi motivasiya ilə hazırlaşmalıyıq. Bundan sonra inanıram ki, istədiyimiz səviyyədə mübarizə apara biləcəyik".