"Qarabağ"dan ayrılan Vüqar Nadirovun "Xəzər Lənkəran" klubuna keçidi rəsmiləşib. Bu barədə qol.az-a təcrübəli hücumçu özü məlumat verib.

Millimizin üzvü cənub təmsilçisi ilə iki illik müqavilə imzalayıb. O, yeni komandasında da "Qarabağ"da olduğu kimi 17 nömrəli forma geyəcək. Nadirov 2005-2007-ci illərdə də "Xəzər Lənkəran"ın şərəfini qoruyub.

Bu arada isə baş məşqçi postuna Samir Əliyevi gətirən "Neftçi" Ernest Nforla yollarını ayırıb. Nfor futbolinfo.az-a deyib ki, "Neftçi" ilə 2016-cı ilin yayına qədər müqaviləsi vardı:

"Lakin mövsüm bitən kimi onlar mənimlə yolları ayırmaq istədiklərini dedilər. Bildirdilər ki, özümə yeni klub tapmalıyam. Hazırda yeni təkliflər üzərində düşünürəm. Mən orada qalmaq istəsəm də, klub istəmədi".
Nfor S.Əliyevin baş məşqçi olmasından xəbərsiz olduğunu da dilə gətirib.