Çox çətin oyun oldu. Azərbaycan əla formadadı.

Axar.az APA-ya istinadən xəbər verir ki, bunu Malta yığmasının baş məşqçisi Pietro Gedin deyib. Görüşdən sonra keçirilən mətbuat konfransında Gedin bərabərliyi belə şərh edib:

"Biz bu gün yaxşı çıxış etdik. İtaliya ilə matçda çox güc sərf etmişdik. İlk qoldan sonra komandamız özünə gəldi. Müdafiə xəttinin səhvi normaldı. Azərbaycanın vurduğu ikinci qolda da bizim müdafiəçilər səhvə yol verdilər. Futbolda səhvlər normal haldı".

O, nəticədən məmnun qalmadığını bildirib:

"Daha çox şeyə ümid edirdik. Azərbaycan yaxşı komandadı. İtaliya ilə matçdan sonra üzərimizdə çox təzyiq var idi. Əsas odu ki, birinci qoldan sonra toparlandıq".

Qeyd edək ki, Avro-2016-nın seçmə mərhələsi çərçivəsində J qrupunun autsayderi olan Malta millisi Azərbaycan yığmasını qəbul edib. Qarşılaşma heç-heçə (2:2) başa çatıb.