Bu gün Topaz Premyer Liqasında IV tura start veriləcək.

Axar.az-ın məlumatına görə, "Kəpəz" AZAL-ı qəbul edəcək.

"İnter" isə "Qəbələ" ilə görüşəcək. Roman Qriqorçukun yetirmələri ilk 3 turdan 7 xal toplayıb və turnir cədvəlinin şərikli liderlərindən biridir. "İnter" isə 4 xal toplaya bilib.

Bu qarşılaşma "bankirlər" üçün qələbə qazanacaqları halda liderlərə çatmaq baxımından çox əhəmiyyətlidir.

Paytaxtda keçiriləcək digər qarşılaşmada isə "Qarabağ" "Xəzər Lənkəran"ı qəbul edəcək. Bu görüşü turun mərkəzi qarşılaşması adlandırmaq olar. Şübhəsiz ki, matçın favoriti "Qarabağ"dır.

Ancaq "ağ-yaşıllar"ı da hesabdan silmək olmaz. Yunis Hüseynovun komandası bu mövsüm ən pis halda, Avropa Liqasına vəsiqə qazanmaq uğrunda mübarizə aparır.

"Qarabağ"ın bu oyundan 5 gün sonra səfərdə "Tottenhem"lə ağır görüşə çıxacağını nəzərə alsaq, Qurban Qurbanov əsas heyətin bir neçə üzvünə istirahət verə bilər.