Püşk zamanı Azərbaycan və Qazaxıstan klubu ilə eyni qrupa düşməkdən qorxurduq. Bizi səfərin uzun və yorucu olması çəkindirirdi.

Axar.az xəbər verir ki, bu sözləri Belçikanın "Anderlext" klubunun futbolçusu Giyom Jille deyib.

31 yaşlı müdafiəçi "Qarabağ"la bu axşam Bakıdakı oyunu haqda fikirlərini açıqlayıb. APA yazıb ki, futbolçu çətin oyun keçəcəyini düşünür:

"Təəssüf ki, qorxduğumuz başımıza gəldi. Ancaq bir məsələ də var ki, "Monako" və "Tottenhem" də eyni yolu qət etməli olacaq.

Əslində, səfərin necə keçməsi vacib deyil, əsas qələbə qazanmağımızdır. Bakı səfəri heç də asan alınmadı. Amma qazanılacaq 3 xal hər şeyi gözəlləşdirəcək".

Jille sabiq komanda yoldaşları Reynaldo və Samuel Armenterosun indi "Qarabağ"da oynamasından da danışıb: "Qarabağ" bu iki oyunçudan ibarət komanda deyil. Bizim rəqibimiz elə komandadır ki, onu qiymətləndirməmək olmaz".