Son turlarda itirilən xalların səbəblərindən biri də oyundan kənar amillərdir. Ancaq biz peşəkarıq. Meydana çıxdıqda öz vəzifəmizi yerinə yetirməliyik. UEFA tərəfindən ayrılan pulun "İnter"in hesabına köçməsindən xəbərimiz yoxdur.

Axar.az xəbər verir ki, bu sözləri "İnter"in futbolçusu Nizami Hacıyev deyib.

Futbolçu qol.az-a bildirib ki, kiməsə inamı qalmayıb: "Pul bizə verilənə qədər heç kimə inanmayacam. Klub rəhbərliyi bizə necə baxacaqsa, elə də oyun oynayacağıq. Keçən ildən 4 aylıq maaşım və bonuslarım hələ də verilməyib. Bu il də quru maaşa futbol oynayırıq. Amma o da bu aydan yoxdur".

N.Hacıyev bildirib ki, "Qəbələ" ilə oyuna kimi maaş verilməsə, meydana çıxmaya bilərlər: "Meydana çıxmamaq söhbəti təkcə bu oyunla bağlı deyil. "Qəbələ" ilə oyuna qədər hər şey ola bilər. Maaş verilməsə, meydana çıxmamaq ehtimalı var. Artıq səbrimiz tükənmək üzrədir. Klub rəhbərliyi bu kluba baxmaq istəmirsə, biz də özümüzə bir çarə tapaq".