Əsas səbəb odur ki, klubda gələcəyimi görmədim. Qərara gəldim ki, komandadan gedim.

Axar.az xəbər verir ki, bunu "Rəvan" klubundan ayrılan ukraynalı qapıçı Kostyantin Maxnovski deyib.

Qolkiper APA-ya müsahibəsində söyləyib ki, "Rəvan"da maddi problem var: "Amma ayrılmağımın əsas səbəbi pul deyil. Futbolçu kimi daha da irəli getmək, karyeramı inkişaf etdirmək istəyirəm. "Rəvan"da bu perspektivi görmədiyim üçün getməyə qərar verdim".

Onun sözlərinə görə, yanvarın avansını alıb: "Oktyabr, noyabr və dekabr aylarının maaşları verilməyib. Oktyabrın məvacibinin yalnız 10-15 faizini avans olaraq, almışıq. Qalan pullar isə verilməyib. Dedilər ki, pul olan kimi, verəcəyik. Belə başa düşdüm ki, AFFA kluba pul verməlidir".