Bizə çətin rəqib düşüb. Baxmayaraq ki, bu mərhələdə asan rəqib tapmaq onsuz da çətin idi.

Qol.az-ın məlumatına görə, bu sözləri futzal üzrə Hollandiya millisinin baş məşqçisi Marsel Loosveld dünya çempionatının pley-off mərhələsinin püşkünü dəyərləndirərkən deyib.

Hollandiya mətbuatına danışan Loosveld pley-off mərhələsində qarşılaşacaqları Azərbaycan yığması haqda fikirlərini bölüşüb:

"Bilirik ki, Avropadan dünya çempionatında yalnız 7 komanda iştirak edəcək. Biz də həmin komandalar sırasında olmaq istəyirik. Bunun üçün də pley-off mərhələsində istənilən güclü rəqibi keçməliyik. Azərbaycan yığması yeni oyun üslubunda çıxış edir və hücumda yaxşı təsir bağışlayır. Bu səbəbdən qarşıdakı bir ay ərzində rəqibi diqqətdə saxlamalı və komandamı ilk oyuna yaxşı hazırlamalıyam".

Qeyd edək ki, Azərbaycan və Hollandiya yığmaları arasında ilk oyun martın 22-də Hollandiyada, cavab görüşü isə aprelin 16-da Bakıda keçiriləcək.