İlk gündən Fernandu Santuşa etimad göstərilib və bu yolda sona qədər davam etməlidir.

Axar.az xəbər verir ki, bunu AFFA-nın Məşqçilər Komitəsinin sədri Vaqif Sadıqov Report-a açıqlamasında deyib.

Mütəxəssis heyətə fayda verə biləcək futbolçuların dəvət olunmasının vacibliyini vurğulayıb:

“Millidən gözləntilərimiz həmişə qələbə olub. İnanmışıq ki, azarkeşlərimizi sevindirəcək. Hər iki görüşdə məğlub olmağımızın dəqiq səbəbini baş məşqçi deyə bilər. Kənardan görünən odur ki, Fernandu Santuş axtarışdadır, eksperimentləri davam etdirir. Bunun nəticəsidir ki, oyunlarda hələlik balanslı komanda görə bilmirik. Dünənki görüşdə xeyli dəyişiklik gördük. Zamana ehtiyac var. Hesab edirəm ki, yığmaya fayda verə biləcək və hazır futbolçular dəvət edilməlidir. Ancaq inamımızı itirməməliyik, əks halda heç nə əldə edə bilmərik”.

Qeyd edək ki, Azərbaycan millisi keçirdiyi son iki yoldaşlıq görüşündə, martın 22-də Haitiyə (0:3), ötən gün isə Belarus yığmasına (0:2) məğlub olub.