Azərbaycandan Ermənistana ixrac olunan premium benzin ölkə bazarında gözləniləndən xeyli ucuz satılacaq.

Axar.az Musavat.com-a istinadla xəbər verir ki, bu barədə “Mega Trade” şirkətinin direktoru Karen Ayriyan məlumat verib.

Onun sözlərinə görə, Azərbaycan istehsalı olan Aİ-95 markalı benzin Ermənistanda bir litr üçün 440 drama (təxminən 1,10 dollar və ya 1,9 manat) təklif olunacaq. Bu isə hazırkı bazar qiymətindən – 520 dramdan (1,30 dollar) – xeyli aşağıdır. Şirkətin artıq təxminən 600 ton benzin aldığı bildirilir.

Erməni KİV-lərinin yazdığına görə, Azərbaycandan Ermənistana Gürcüstan ərazisi tranziti ilə ümumilikdə 1220 ton Aİ-95 benzini göndərilib. Yanacaq Heydər Əliyev adına Bakı NEZ-də istehsal olunub və bu həcmdəki yük 22 dəmir yolu sisterninə bərabərdir.

Azərbaycandan idxal edilən benzin "Ran Oyl" yanacaqdoldurma məntəqələri şəbəkəsi vasitəsilə satışa çıxarılacaq.

Qeyd edək ki, Azərbaycanda Aİ-95 markalı benzinin bir litri hazırda 1,6 manatdır.