Yunanıstan, Bolqarıstan, Rumıniya, Moldova və Ukraynanın milli enerji tənzimləyiciləri regional əlaqəni və təchizat təhlükəsizliyini gücləndirən yeni 2 və 3 nömrəli marşrutları təsdiqləyiblər.

Axar.az Bakupost.az-a istinadən xəbər verir ki, İCGB-nin (Yunanıstan-Bolqarıstan Qarşılıqlı Əlaqə Operatoru) iştirakı ilə hazırlanmış marşrutlar, xüsusən də Azərbaycandan Yunanıstana, Albaniyaya və İtaliyaya qaz nəql edən Trans-Adriatik Boru Kəməri (TAP) vasitəsilə qaz tədarükünə imkan verir.

Dekabrın 22-dən etibarən marşrutlar Regional Rezervasiya Platformasında (RBP) mövcud olacaq və ICGB istifadəni təşviq etmək üçün standart aylıq qiymətində 46% endirim təklif edir.

“Bu, şaquli qaz dəhlizi oxu boyunca yerləşən ölkələrdəki operatorlar və Avropa Komissiyası ilə sıx əməkdaşlıq çərçivəsində koordinasiyalı idarəetmə və texniki işin nəticəsidir. İCGB bölgə üçün qaza çevik, etibarlı və şaxələndirilmiş çıxış təmin etmək, xüsusilə də Ukraynanı kritik anda dəstəkləmək məqsədi ilə yeni məhsulların hazırlanmasında və tətbiqində aparıcı rol oynayıb”, - İCGB-nin icraçı direktorları Georgi Satlas və Teodora Georgiyeva bildiriblər.