ABŞ Prezidenti Donald Trampın dolların məzənnəsinin aşağı düşməsinə müsbət yanaşmasının arxasında iqtisadi məntiq dayanır. Dolların əsas valyutalar, xüsusilə avro qarşısında zəifləməsi Amerika mallarının dünya bazarında daha sərfəli və rəqabətli olmasına imkan yaradır.

Bu sözləri Axar.az-a açıqlamasında iqtisadçı Natiq Cəfərli Donald Trampın dollar siyasətindən danışarkən deyib.

İqtisadçının sözlərinə görə, ABŞ dünyanın bir nömrəli iqtisadiyyatı olduğu üçün dolların zəifləməsi faktiki olaraq Avropa ölkələri üçün əlavə iqtisadi yük yaradır:

“Ucuz dollar o deməkdir ki, Amerika mallarının alınması və daşınması Avropa və digər regionlar üçün daha sərfəli olur. Bu da ABŞ məhsullarının satışını artırır. Donald Tramp da məhz istehsalın və Amerika mallarının dünya bazarlarında daha çox satılmasının tərəfdarı olduğu üçün ucuz dollar siyasətini dəstəkləyir.

Söhbət dolların kəskin dəyər itirməsindən yox, əsas valyutalar qarşısında müəyyən qədər zəifləməsindən gedir və bu yanaşma bir çox ölkə tərəfindən tətbiq olunur. Məsələn, ABŞ-la Çin arasında uzun illərdir davam edən iqtisadi gərginliyin əsas səbəblərindən biri yuanın məzənnəsi olub. Çin yuanı qəsdən tədricən devalvasiyaya uğradaraq öz mallarını daha rəqabətli edib”.

Ekspert FES-lə (Federal Ehtiyat Sistemi) Tramp administrasiyası arasında yaranan gərginliyə də toxunub. Onun sözlərinə görə, mübahisənin əsas səbəbi uçot dərəcələri ilə bağlıdır:

“Tramp istəyir ki, faiz dərəcələri aşağı salınsın, kreditlər ucuzlaşsın və iqtisadi canlanma artsın. FES isə hesab edir ki, faizlərin kəskin endirilməsi inflyasiyanın yüksəlməsinə səbəb ola bilər. Ona görə də Mərkəzi Bank daha ehtiyatlı mövqe tutur”.