Qazaxıstan parlamenti Azərbaycan və Özbəkistanla yaşıl enerji istehsalı və ötürülməsi sahəsində strateji tərəfdaşlıq haqqında Sazişi ratifikasiya edib.

Axar.az xəbər verir ki, bu barədə “Sputnik-Qazaxıstan” məlumat yayıb.

Sənədə əsasən, daxili enerji infrastrukturunun genişləndirilməsi və yeni elektrik ötürmə xətlərinin inkişafı nəzərdə tutulur. Həmçinin layihə çərçivəsində yaşıl enerjinin ötürülməsi üçün Xəzər dənizinin dibi ilə Özbəkistan və Qazaxıstandan Azərbaycana sualtı kabelin çəkilməsi planlaşdırılır. Daha sonra bu enerji Qara dəniz enerji dəhlizinə inteqrasiya edilərək Avropa ölkələrinə ixrac ediləcək.

“Eyni zamanda, saziş çərçivə xarakteri daşıyır və avtomatik şəkildə maliyyə və ya digər öhdəliklərin qəbulunu nəzərdə tutmur. Konkret layihələrin həyata keçirilməsi ayrı razılaşmalar əsasında və milli qanunvericilik çərçivəsində aparılacaq. Bu isə riskləri minimuma endirir və sazişin mərhələli şəkildə icrasını təmin edir”, – deyə parlamentin deputatı Yedil Janbırşın bildirib.

Bundan əlavə, sazişdə bərpa olunan enerji mənbələrinin potensialından səmərəli istifadə, ölkələr arasında və Avropa dövlətləri ilə ekoloji təmiz elektrik enerjisinin ticarətinin inkişafı nəzərdə tutulur.

Həmçinin qeyd olunub ki, Mərkəzi Asiya ölkələrinin enerji sistemləri ilə Azərbaycanın enerji sistemi arasında bağlantı təmin ediləcək ki, bu da yaşıl elektrik enerjisinin sabit və proqnozlaşdırıla bilən ixracına imkan yaradacaq.