Ötən il Azərbaycanda iqtisadi artım cəmi 1,4% olub. Bu baxımdan 2% ətrafında proqnoz azalma deyil. Ümumiyyətlə isə son illərdə ölkədə aşağı iqtisadi artım müşahidə olunur və 2026-cı ilin yanvar-fevral statistikasında artım cəmi 0,3% təşkil edib.

Bu sözləri Axar.az-a açıqlamasında iqtisadçı Xalid Kərimli Asiya İnkişaf Bankının ölkəmizdəki iqtisadi artım proqnozları haqqında danışarkən deyib.

Ekspert bildirib ki, Azərbaycanda iqtisadi artımın zəif qalmasının əsas səbəbi neft sektorundan asılılıqdır:

“Neft hasilatı və ixracı iqtisadiyyatın mühüm komponentidir və hasilat azaldıqca bu, ümumi daxili məhsulun artım tempinə birbaşa təsir göstərir. Neft sektoru ümumi iqtisadiyyatda böyük paya malikdir. Bu sektor kiçildikcə, ümumi iqtisadi artım səviyyəsi də aşağı düşür.

Büdcə kəsirinin ÜDM-in 2%-dən yuxarı olması fiskal dayanıqlılıq üçün ciddi risk yaratmır. Zərurət yaranarsa, hökumət xərcləri azaldaraq və investisiyaları məhdudlaşdıraraq vəziyyəti tənzimləyə bilər”.

İqtisadçı həmçinin vurğulayıb ki, inflyasiyanın artması əhalinin real gəlirlərinə mənfi təsir göstərir.

Qeyd edək ki, Asiya İnkişaf Bankı Azərbaycanın 2026-cı ildə iqtisadi artımını 2%, 2027-ci ildə isə 1,8% səviyyəsində proqnozlaşdırıb.