Azərbaycanda kredit faizlərinin formalaşmasında əsas amil banklara yerləşdirilən depozitlərin faiz göstəriciləridir. Bu da onu deməyə əsas verir ki, depozitlərin faizləri azaldıqda kreditlərin faizləri də azalmalı, əks halda isə artmalıdır.

Axar.az xəbər verir ki bu barədə Baku TV-nin videomaterialında bildirilib.

Lakin maraqlıdır ki, rəsmi məlumatlar bunun əksini göstərir. Belə ki, Mərkəzi Bankın məlumatına görə, 2025-ci ilin sonu ilə müqayisədə 2026-cı ilin birinci rübünün yekununda banklarda manatla olan depozit və əmanətlərin faizləri orta hesabla 9.4 faiz olaraq sabit qalıb. O cümlədən, fiziki şəxslərin əmanət faizləri orta hesabla 10.3%-dən 10.2%-ə enib. Kreditlərin faizləri isə sözügedən dövrdə orta hesabla 15.4 faizdən 15.6 faizə yüksəlib. Kredit faizlərindəki artım təkcə rüblük yox, illik müqayisədə də müşahidə olunub.

İqtisadçı Ruslan Atakişiyev məsələni belə şərh edib:

"Daha çox müştəriyə çıxış riskli müştərilərə doğru hərəkəti artırır. Nəticədə risklərin artma ehtimalı yaranır. Nəticədə həmin risklərin qarşılanması və idarə olunması üçün faiz dərəcələrində artım baş verir".

İqtisadçı Eyyub Kərimli isə bankların depozit faizlərini, endirimlərini əsasən vəsaitə tələbatın azalması ilə izah edir:

"Depozit faizlərinin azalması əsasən banklarda likvidliyin kifayət qədər yüksək olması ilə əlaqədar ola bilər. Belə ki, artıq likvidliyin yüksək olması ilə əlaqədar banklar əhalidən depozitin qəbul edilməsində az maraqlı olurlar".