Ötən gün Mərkəzi Bankının sədri hörmətli Taleh Kazımov bir qrup iqtisadçını növbəti dəfə görüşə dəvət etmişdi. Belə diskussiyalar artıq çox yaxşı bir ənənəyə çevrilir. Taleh müəllimə dəvətə və açıq müzakirələrə görə təşəkkür edirəm.

Axar.az xəbər verir ki, bu sözləri iqtisadçı Natiq Cəfərli qeyd edib.

O bildirib ki, müzakirələrdə bir neçə məsələni qaldırıb:

“Mən dövlət qurumlarına onlayn cərimə və digər ödənişlər edərkən rüsum tutulmasının doğru olmadığını söylədim. Taleh müəllim söz verdi ki, bu məsələ ilə ciddi məşğul olacaq – doğrudan da, məsələn, qaydanı pozursan, 10 manat cərimə gəlir, tez ödəyəndə 10% endirim var, yəni 9 manat ödəmək lazımdır, amma ödəniş edərkən 40 qəpik xidmət haqqı tutulur. Bu, düzgün və ədalətli yanaşma deyil.

Digər sualım iqtisadiyyatımızın vəziyyəti haqqında idi – doğrudur, iqtisadi aktivlik birbaşa Mərkəzi Bankın mandatına aid deyil, ona görə də sualım vacib dövlət institutu olan Mərkəzi Bankın hökumətin iqtisadi siyasətinə baxışı barədə idi. Məlumdur ki, iqtisadiyyatımız 1-cü rüb daralıb, aktivlik azalıb, biznes önünü görmür və iqtisadiyyat naziri də bu günlərdə bəyan etdi ki, Azərbaycan artıq yeni iqtisadi modelə keçir.

Qeyd etdim ki, biz hələ köhnə modelin nə olduğunu bilmirdik, adı qoyulmamışdı, bəs bu yeni model necə olacaq?! Taleh müəllim dövlət-hökumət orqanlarında bu məsələ ilə bağlı ciddi diskussiya olduğunu söylədi və dedi ki, yeni yanaşma kiçik-orta sahibkarların və investorların marağı üzərində inşa olunacaq. İnşallah, təki elə olsun!”