Rusiyada kölgə iqtisadiyyatın həcmi (dövlətin nəzarətində olmayan və nəzarət edə bilmədiyi iqtisadi fəaliyyət – red.) ümumdaxili məhsulun təxminən 22%-ni təşkil edir.

Axar.az xəbər verir ki, bu barədə informasiyanı “RİA Novosti” agentliyi özünün etibarlı mənbələrinə istinadən yayıb.

Agentlik həmçinin Ümummilli Həmkarlar Konfederasiyasının kölgə iqtisadiyyatla bağlı hesabatına da diqqət yetirib. Hesabata əsasən, 2008-2009-ci il iqtisadi böhranı və davam edən durğunluq dövründə Rusiyada kölgə iqtisadiyyat artıb. Buna şəraiti daha çox çətin iqtisadi vəziyyət və işsizlik yaradıb.

Qeyd edək ki, Avropada hazırda ən böyük kölgə iqtisadiyyat Bolqarıstan (30,6%), Rumıniya (28%), Türkiyə (27,8%), Xorvatiya (27,7%), İtaliya (27%), Estoniya (26,2%), Yunanıstan (26%), Litva (25,8%), Latviya (23,6%) və İspaniyadadır (22%).