"Satılacaq qazın qiymətinin neçəyə olması ilə bağlı heç bir məlumat yoxdur".

Bunu Axar.az-a "Ukrtransqaz" şirkətinin baş mühəndisinin müavini Oleq Mixaleviçin TANAP-la bağlı layihəsini şərh edən neft-qaz məsələləri üzrə ekspert İlham Şaban bildirdi:

"Rəsmi Kiyev ölkəyə qaz idxalı üçün başqa mənbələrdən istifadə etmək istəmələri ilə bağlı planlarının olmasını dəfələrlə açıqlayıblar. Burda nəzərdən keçirilən variantlar çox olsa da, ən əhəmiyyətlilərindən biri TANAP-ın olduğu deyilir. Əslində, məsələ TANAP vasitəsilə Avropa bazarlarına çatdırılan Azərbaycan qazının Ukraynaya satılmasıdır. Ukrayna burada "interkonnektorlar" deyilən ölkələr arasındakı birləşdirici xətlərin çəkilməsini istəyir. Bu o deməkdir ki, rəsmi Kiyev bu məqsəd üçün Avropa Birliyi ölkələri ilə razılaşmağa çalışacaq. Amma satılacaq qazın qiymətinin neçəyə olması ilə bağlı heç bir məlumat yoxdur. Sadəcə, qazın satın alınması ilə bağlı ideyalar var".

Ukraynanın TANAP-la bağlı ideyasının reallaşmasına Rusiyanın hansısa maneələr yaratmaq ehtimalının az olduğunu deyən ekspert, bunun üçün rəsmi Moskvanın Avropa Birliyi ilə qarşı-qarşıya gələcəyini deyir:

"Hesab edirəm ki, Rusiyanın bu məsələyə mane olması mümkün deyil. Rusiya bu işin qarşısını necə ala bilər?! Onda gərək getsin Rumıniyada, Bolqarıstanda qaz kəmərlərini bağlasın. Bu, mümkünsüz bir işdir. Digər tərəfdən də düşünürəm ki, Rusiya heç bunun qarşısını almaq niyyətində də deyil".

Xatırladaq ki, "Ukrtransqaz" şirkətinin baş mühəndisinin müavini Oleq Mixaleviç mediaya açıqlamasında deyib ki, Ukrayna hökuməti TANAP layihəsinin tikintisinin reallaşmasında mümkün iştirakını nəzərdən keçirməyə başlayıb.

Mixaleviçin sözlərinə görə, qazın təchizat terminalı qismində Xorvatiyanın Aralıq dənizində tikintisinə hazırlaşdığı LNG terminalı ola bilər. O, həmçinin əlavə edib ki, Ukraynanın qaz şaxələnməsində iştirakı gələcəkdə ölkəsini Şərqi Avropa dövlətlərinə mavi yanacağın təminatında mühüm tranzit ölkəyə çevrilə bilər.