"Neftin qiyməti yaxın gələcəkdə 75-85 dollar arasında gedib-gələcək. Gələn il ABŞ koqressi daha çox neft və neft məhsullarının ixracına icazə versə və İranla bağlı bütün sanksiyalar aradan götürülsə, neftin 60-65 dollara qədər enmə ehtimalı var".

Axar.az xəbər verir ki, bu barədə Feysbuk səhifəsində Natiq Cəfərli yazıb. Onun sözlərinə görə, neftin qiymətinin enməsinin bir neçə iqtisadi səbəbi var:

1) 2008-ci ilə qədər Şimali Amerika dünyada istehsal olunan neftin 30%-ə yaxınını istehlak edirdi. Əsasən, Venesuela və Ərəb yarmadasından neft alırdılar. Qətərdən isə ildə 30-35 mlrd. kub qaz istehlak olunurdu. 2009-cu ildə ABŞ dünyada ən çox qaz istehsal edən ölkə oldu və Qətərdən qaz almasını dayandırdı. Özü-özünü qazla tam təmin etdi. 2016-cı ildən isə ixraca başlayacaq. Neftlə bağlı isə ABŞ bu ildən özü-özünü tam təmin etdi. Bundan əlavə 40 ildən sonra ilk dəfə olaraq ABŞ gündə 600 min barel neft kondensatını dünya bazarında satmağa başladı.

2) ABŞ-ın Federel Rezerv Sistemi (FED, bir növ onların Mərkəzi Bankı) 2008-dən bəri hər ay dünya birjalarına 85 mlrd. dollar vəsait axıdırdı. Bu isə qiymətləri yuxarı çəkirdi və 2014-ün əvvəlindən hər ay bu proqram azaldılmağa başladı. Gələn ilin əvvəlindən isə tamam bağlanır, yəni bazarlarda ucuz pul dövrü bitir. FED gələn ildən uçot dərəcəsini qaldıracaq, bu isə dolların daha da "bahalı" olması ilə nəticələnəcək.

3) OPEK ölkələrində neft hasilatı artır. Bundan əlavə ilin əvvəlində Liviyada gündəlik hasilat 250 min barel olduğu halda, indi 1 milyon barel neft hasilatı bərpa olunub. Bu ölkələrdə hasilatın azalması onların gəlirlərinin azalması ilə nəticələnir. Eyni vəziyyət Rusiyada da hökm sürür.

4) İran kimi böyük neft-qaz potensialı olan ölkə artıq dünya bazarına yenidən daxil olmağa başlayır. Əgər yaxın gələcəkdə İranla bağlı sanksiyalar götürülsə, bu ölkə gündə 3,5-4 milyon barel neft istehsal ederək dünya bazarına çıxara bilər.

Neftin qiyməti yaxın gələcəkdə 75-85 dollar arasında gedib-gələcək. Gələn il ABŞ Konqresi daha çox neft və neft məhsullarının ixracına icazə versə və İranla bağlı bütün sanksiyalar aradan götürülsə, neftin 60-65 dollara qədər enmə ehtimalı da var.