Azərbaycan ölkə xaricindəki investisiya layihələrini müvəqqəti dondura bilər.

Axar.az-ın əldə etdiyi məlumata görə, hökumət Gürcüstana investisiya qoyuluşuna ara verməyi planlaşdırır. Buna səbəb dünyada neftin ucuzlaşması təhlükəsidir.

Azərbaycan son illər Gürcüstan turizminə milyardlarla investisiya qoyub, müxtəlif layihələr həyata keçirib. Eyni zamanda, başqa ölkələrdə də kapital qoyuluşu var.

Xəbərdə bildirilir ki, Azərbaycan 2008-ci ildə qlobal maliyyə böhranı yarananda da analoji addımı atmışdı, investisiya qoyuluşlarını dayandırılmışdı.

ARDNŞ-in prezidenti Rövnəq Abdullayev hazırda bu planla bağlı düşündüklərinə işarə edib. O bildirib ki, əgər neftin qiyməti ucuzlaşmaqda davam edərsə, şirkət xərclərinin və kapital qoyuluşlarının azaldılması məsələsinə baxacaq.

Prezident İlham Əliyev də Nazirlər Kabinetində keçirdiyi son müşavirədə neftin ucuzlaşması probleminə toxunaraq, hökuməti buna hazır olmağa çağırmışdı.