Gələn il Dövlət Neft Fondundan dövlət büdcəsinə 10.388 milyon manat (təxminən 13 milyard manat) transfer ediləcək.

Axar.az xəbər verir ki, bu barədə Maliyyə Nazirliyinin büdcə layihəsində məlumat əksini tapıb. Məlumatda bildirilir ki, 2015-ci ildə Dövlət Neft Fondundan dövlət büdcəsinə nəzərdə tutulan transfertlər cari ilin proqnozuna nisbətən 1 milyard 51 milyon manat və ya 11,3 faiz çoxdur.

Xatırladaq ki, büdcəsi neft gəlirlərindən asılı olan ölkələr sırasında yer tutan Rusiyada da neftin ucuzlaşması ilə ehtiyat fonddan transferlər nəzərdə tutulur. Rusiyanın Maliyyə naziri Anton Siluanov neft qiymətlərinin 2015-ci ildə artmayacağı təqdirdə büdcə kəsrini qarşılamaq üçün ehtiyat fonddan 12,5 milyard dollar ayırmaq məcburiyyətində qalacaqlarını açıqlayıb. Onun sözlərinə görə, sanksiyalar dövrü üçün nəzərdə tutulan 90 milyardlıq ehtiyat fondundan bu məqsədlə istifadə ediləcək.

Yada salaq ki, Dumaya təqdim edilən dövlət büdcəsində neftin qiyməti 2015-ci il üçün 100 dollar nəzərdə tutulub, Azərbaycanda isə bu rəqəm daha sığortalıdır – 90 dollar.

Buna baxmayaraq, iqtisadçılar 90 dolların özünü belə riskli sayırlar. Çünki hazırda 85-87 dollar civarında dəyişən neftin dünya bazarındakı qiymətinin daha da aşağı düşəcəyi proqnozlaşdırılır. Bəzi beynəlxalq analitiklər ABŞ Prezidenti Barak Obamanın Səudiyyə Ərəbistanına səfərindən sonra Rusiya iqtisadiyyatını çökdürmək üçün neftin bir barrelinin 50 dollara qədər endiriləcəyi barədə razılıq əldə olunduğunu iddia edir. Bu iddiaların doğrulacağı təqdirdə dünya iqtisadiyyatında ümumi gərginlik yaşanacağından iqtisadçılar narahatdırlar.