Azəristiliktəchizat ASC yanvarın 16-dan başlayaraq ölkə ərazisində ifrat təhlükəli hidrometroloji hava proqnozu ilə bağlı gücləndirilmiş iş rejimində çalışacaq.

Bu barədə Axar.az-a açıqlamasında Azəristiliktəchizat ASC-nin Abonent və Müştəri Xidmətlərinin rəisi Rafiq Əliyev deyib. O bildirib ki, bununla bağlı qurum rəhbərliyinin xüsusi tapşırığı olub:

“Azəristiliktəchizat ASC payız-qış mövsümünə hazırlıq çərçivəsində həyata keçirilən tədbirlərdə ən sərt qış rejimində də qazanxanalarımızın hazırlığı nəzərdə tutulub. Havanın soyuq keçməsi ilə əlaqədar rəhbərlik tərəfindən xüsusi tapşırıq verilib ki, bütün istilik sistemləri, istismar sahələri gücləndirilmiş iş şəraitində işləməli və rəhbər şəxslər növbətçilik əsasında işə nəzarət etməlidirlər. Qazanxana, istilik şəbəkələri, magistral və məhəllədaxili istilik kəmərləri, nəzarət ölçü cihazları və avtomatika, qaz, elektrik, nəqliyyat təsərrüfatları və digər istehsal təyinatlı avadanlıqların xidməti də gücləndirilmiş iş rejimində fəaliyyət göstərəcək”.

Qeyd edək ki, bu gün axşam saatlarından başlayaraq, 18 yanvara qədər ölkə ərazisində kəskin soyuqlar və külək gözlənilir.