Brent markalı neftin qiyməti cari ildə 64-66 dollar arasında dəyişəcək.

Bu sözləri Axar.az-a Beynəlxalq Böhran Qrupunun 2019-cü il üzrə proqnozunun neftin qiymətlərinə təsiri haqda danışan Neft Araşdırmalar Mərkəzinin rəhbəri İlham Şaban deyib. Ekspert sözügedən proqnozun dünya bazarında neft qiymətlərinə ciddi təsir göstərəcəyini deyib:

“Nəinki Beynəlxalq Böhran Qrupu, eləcə də Beynəlxalq Enerji Agentliyi, enerji mərkəzləri və investisiya banklarının proqnozları neftin qiymətlərini aşağıya doğru çəkir. Belə ki, ötən ilin dekabrında neftin qiyməti 70 dollar proqnoz edilirdisə, indi artıq “Brent” markalı neftin qiyməti cari il üçün 64-66 dollar arasında proqnoz edilir. Bu da neft hasilatının artması, dünyada, əsasən də istehlakçı ölkələrdə - Çin və Avropada ilin başlanğıcından iqtisadi artımın yüksək tempdə olmaması faktorları ilə bağlıdır. Yəni belə hesab edirlər ki, enerjiyə tələbat yüksək səviyyədə olmayacaq. Bu baxımdan da il başlayandan dünya bazarında neft qiymətləri 61-62 dollar arasında dəyişir. Bir sözlə, hələ ki, OPEK və OPEK+ tərədinfən atılan addımlar neftin qiymətini 65 dollara çəkir”.

Qeyd edək ki, Beynəlxalq Böhran Qrupu 2019-cü il üzrə dünyada qarşıdurmalar və böhranlarla bağlı proqnoz hazırlayıb.

Proqnozda dünya üçün riskli olan hadisələrin adları açıqlanıb.