Son günlər kütləvi informasiya vasitələrində 2020-ci ilin dövlət büdcəsində qeyri-neft sektorunun payı 12 faiz artacağı ilə bağlı yayılan informasiyalar həqiqəti əks etdirmir.

Axar.az xəbər verir ki, bunu iqtisadçı Rəşad Həsənov qeyd edib. O bildirib ki, 2020-ci ilin dövlət büdcəsində qeyri-neft sektorunun payı (xüsusi çəkisi) cəmi 3 faiz bəndi artaraq 43.9 faiz olacaq:

“Büdcə gəlirlərinin 56.1 faizi neft sektorundan birbaşa daxilolmalar hesabına formalaşacaq. 12 faiz artım dövlət büdcəsinin qeyri-neft sahəsi üzrə gəlirlərində proqnozlaşdırılır. Amma bunun sektorun büdcədəki payına təsiri 3 faiz bəndi olacaq”.

İqtisadçı neft sektorundan büdcə daxilolmalarının cari illə müqayisədə 1.2 faiz daha az proqnozlaşdırldığını söyləyib:

“Bunun da əsas səbəbi neftin qiymətinin növbəti il üçün 5 dollar az (bir barrel üçün 55 ABŞ dolları) proqnozlaşdırılması səbəbindən sektordan vergi daxilolmalarının 2019-cu illə müqayisədə azalmasıdır”.