Son zamanlar dünya birjalarında neftin qiymətinin artması “Lukoyl” şirkəti üçün də investisiya imkanları yaradıb. Bu baxımdan “Lukoyl” şirkətinin Azərbaycanda fəaliyyətini genişləndirməsi müəyyən mənada neft sektorunda canlanmaya səbəb ola bilər.

Bu sözləri iqtisadçı Rəşad Həsənov Azərbaycan Respublikasının Prezidenti İlham Əliyevin yanvarın 21-də Davosda Rusiyanın “Lukoyl” şirkətinin prezidenti Vahid Ələkbərov ilə görüşünü Axar.az-a şərh edərkən deyib. Onun sözlərinə görə, “Lukoyl” kifayət qədər tanınan və öz sözünü demiş bir neft şirkətidir:

“Lukoyl” neft şirkəti Azərbaycan ilə yaxından maraqlanan və məlumatı olan, əlaqələrə malik bir şirkətdir. Onu da qeyd edim ki, Azərbaycanda son zamanlar neft hasilatı azalmaqdadır və azalan neftin kompensasiyası üçün nisbətən daha dərinlikdəki yataqlardan neftin çıxarılmasına ehtiyac var.

“Lukoyl” şirkətinin digər bir önəmli cəhəti də təsisçisinin Azərbaycan əsilli olmasıdır. Düşünürəm ki, bu baxımdan “Lukoyl”un fəaliyyətini genişləndirməsi ölkəmiz üçün uğurlu olacaq.

Ümumiyyətlə, hökumətin gələcəyə yönəlik planı ondan ibarətdir ki, Xəzərin mövcud potensialından maksimum dərəcədə istifadə olunsun”.

Qeyd edək ki, yanvarın 21-də Davosda Azərbaycan Respublikasının Prezidenti İlham Əliyev ilə Rusiyanın “Lukoyl” şirkətinin prezidenti Vahid Ələkbərov arasında Azərbaycanın “Naxçıvan”, “Qoşadaş” yataqlarının birgə işlənilməsi məsələsi müzakirə olunub və bu barədə razılıq əldə edilib.