I Avropa Olimpiya oyunları ilə əlaqədar paytaxta gətiriləcək avtobuslar yanacaqsız qala bilər.

Axar.az xəbər verir ki, maye qazla çalışan avtobuslar üçün Bakıda tikintisi nəzərdə tutulan stansiyaların inşası naməlum səbəblərdən yubanır.

Əldə etdiyimiz məlumata görə, ARDNŞ səlahiyyətliləri stansiyaların tikintisinə aprel ayında başlanılmasını nəzərdə tutur. Lakin 2 ay ərzində bir neçə stansiyanın istifadəyə veriləcəyi böyük sual altındadır.

Bildirək ki, ölkədə benzinə olan tələbatı tənzimləmək, eyni zamanda ətraf mühitə dəyən zərəri minimuma endirmək üçün avtomobillərdə qazdan istifadə olunması planlaşdırılır. Bu məqsədlə bütün ölkə ərazisində qazdoldurma stansiyaları quraşdırılacaq. Bununla bağlı ARDNŞ-in "Azəriqaz" İstehsalat Birliyi layihəyə başlayıb.

Ötən ilin noyabrında ARDNŞ prezidenti Rövnəq Abdullayev 2015-ci ildə Bakıya gətiriləcək avtobusların qazla işləyəcəyini bildirmişdi. Şirkət rəhbərinin sözlərinə görə, bununla əlaqədar Bakı və Bakı ətrafında 6 yeni stansiyanın tikintisi nəzərdə tutulub.

Plana görə, ilbəil bu stansiyaların sayı artırılacaq və hər 180 kilometrdən bir qaz stansiyası olacaq.