Mərkəzi Bankın ikivalyutalı səbətə keçməsindən və manatın nisbətən ucuzlaşacağı rəyindən sonra Bakıda bir çox valyutadəyişmə məntəqəsində dollarla bağlı çox ciddi ajiotaj yaşanır.

Valyutadəyişmə məntəqələrində yaşanan gərginliklə bağlı Axar.az-a maraqlı məlumat daxil olub. Məlumata görə, ötən gün günorta saatlarına qədər Bakının yalnız valyutadəyişmə məntəqələrində əhali tərəfindən 120 milyon ABŞ dolları satın alınıb.

Mənbənin qeydlərinə görə, məhz bu fakt da valyutadəyişmə məntəqələrində dolların qurtarmasını şərtləndirib.

İqtisadçı ekspert Vüqar Bayramov Axar.az-a açıqlamasında dollarla bağlı vətəndaşlar arasında yaranan panikanın səbəbinə aydınlıq gətirib:

"Manatın dəyərdən düşəcəyi ilə bağlı əhalidə ciddi bir narahatlıq müşahidə olunur. Bu da vətəndaşların valyutadəyişmə məntəqələrinə üz tutmasına gətirib çıxarıb. Amma manatını dollara çevirən vətəndaşlar onsuz da bir müddətdən sonra pul xərcləmək üçün yenidən dolları milli valyutaya çevirəcəklər. Pul dövriyyəsində bəlli həcmdə manat kütləsi var və kənardan ölkəyə milli valyuta idxal edilmir. Bu isə o deməkdir ki, onsuz da müəyyən müddətdən sonra intervensiya xərclərində azalma müşahidə ediləcək".