Dünyada iqtisadiyyatın çökməsi davam edir. Çin iqtisadiyyatında son 30 ildə ilk dəfə azalma qeydə alındı, birinci rübdə ÜDM 6,8% azaldı, bu çox böyük rəqəmdir.

Axar.az-ın məlumatına görə, bu sözləri ekspert Natiq Cəfərli qeyd edib. Onun sözlərinə görə, Çinin iqtisadiyyatı hər 1% azalanda 4 milyon insan işsiz qalır.

“Yaponiya və ABŞ qərar verərək, Çindən istehsal müəssisələrini çıxardırlar - antiqloballaşma sürətlənir. Bu isə o deməkdir ki, pandemiyadan sonra dünyada məhsullar bahalaşacaq”, - deyə ekspert proqnoz verib.

N.Cəfərli hesab edir ki, dünya ölkələri inflyasiya yaratmağa çalışacaqlar, indiki böhrandan çıxış üçün illik azı 5% inflyasiya iqtisadiyyata dərman kimi lazımdır:

“Dünyaya səpilən trilyonlarla dollar da inflyasiya yaradan faktor olacaq. Bəşər tarixinin son 100 ili, obrazlı desək, “keynsçilik” nəzəriyyəsi ilə “friedmançılıq” nəzəriyyəsi arasında gedib-gəlib. Böhranda keynsçilər önə çıxıb, amma duruş gətirə bilməyərək səhvlər ediblər, sonradan friedmançılar revanş götürüb. 2020-ci ildə isə aləm dəyib bir-birinə, keynsçilik önə çıxsa da, indiki böhranın mahiyyətini tuta bilmir, ya da başqa alternativləri görmür. İstehlakın kəskin azalması, vərdiş və davranış qaydalarının sürətlə dəyişməsi baş verir. Hələ bu fenomeni anlamağa doğru-düzgün nəzəriyyə yoxdur. Makroiqtisadiyyat elmi yenidən yazılacaq”.