Postpandemiya dövrünə keçid zamanı ilk olaraq gözəllik salonları və bərbərxanaların açılacağını düşünürəm.

Bu sözləri Axar.az-a açıqlamasında iqtisadçı Natiq Cəfərli postpandemiya dövründə hansı sahələrin fəaliyyətini ilk olaraq bərpa edəcəyi barədə danışarkən deyib.

O bildirib ki, Prezident İlham Əliyev Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə videobağlantı formatında keçirdiyi iclasda postpandemiya dövrünə hazırlıq prosesindən bəhs etmişdi:

“Prezident bu keçid prosesində bəzi sahələrin tədricən açıla biləcəyini vurğulamışdı. Düzdür, bu sahələrin hələ tam olaraq hansı olduğunu vurğulamasa da, məsələ ilə bağlı işlərin getdiyini qeyd etmişdi. Düşünürəm ki, bu məsələdə ilk olaraq insanların daha az bir araya gəldiyi sahələr fəaliyyətini bərpa etməlidir. Çox sadə bir misal kimi mən qəzet köşklərini göstərə bilərəm. Paralel olaraq gözəllik salonları, bərbərxanalar açıla bilər. Bu sahələr sosial məsafə və sanitar normalar tətbiq olunmaqla öz fəaliyyətini bərpa edə bilər. Digər bir sahə isə aşağı kvadratlı qeyri-ərzaq mağazalarının açılmasıdır”.

Ekspert bildirib ki, bunlar iqtisadiyyata ciddi təsir etməsə də, insanların böyük ehtiyac duyduğu xidmət sahələridir:

“Böyük ehtimalla, ictimai nəqliyyat, xüsusilə metro xidmətinin bərpası növbəti addım olacaq. Ancaq ilk mərhələdə insan sıxlığına səbəb olan mollar, restoranlar, şadlıq evlərinin açılacağını düşünmürəm. Yəqin ki, bu xidmət sahələri son açılanlar sırasında olacaq”.