"Dünya valyuta bazarında öz yeri olan dollar hər zaman qüvvədə olub, bundan sonra da olacaq".

Bu sözləri Axar.az-a açıqlamasında Azərbaycanın İqtisadiyyat nazirinin sabiq müavini, iqtisadçı ekspert Oktay Haqverdiyev dünya bazarında dolların sürətlə bahalaşmasına münasibət bildirərkən deyib. O, bu bahalaşmanın bundan sonra da davam edəcəyini açıqlayıb:

"Hazırda dolların ən təsirli rəqibi avrodur. Funt sterlinq o qədər də işlək deyil. ABŞ-ın iyun ayında uçot dərəcəsini artırmaq istəməsi ölkənin daxili, iqtisadi və maliyyə siyasəti ilə bağlıdır. Belə ki, dolların məzənnəsi aşağı düşsə, demək, onlar öz ixraclarını stimullaşdırmaqla sahibkarlığın inkişafına təkan vermək istəyirlər. Əksinə, bahalaşma olarsa, demək ki, tələbatdan çox istehsal olunmasının qarşısnı almaqla qiymətlərin aşağı düşməsin önləmək istəyirlər. Bu, eyni zamanda, avro ölkələri üçün daha əlverişli olardı. Dolların güclü olması böyük iqtisadiyyatla ölçülür. Dünya iqtisadiyyatının 23 faizi bir ölkədə - Amerikadadır. Eyni zamanda dünya iqtisadiyyatının ehtiyacının 40 faizini demək olar ki, Amerika istehlak edir. Harmonik, müasir və çoxşaxəli iqtisadiyyata malik bir ölkənin valyutasının hazırkı dönəmdə güclü olması çox təbiidir. Buna görə də hesab edirəm ki, bu bahalaşma bundan sonra da davam edəcək".