"Azəri-Çıraq-Günəşli" (AÇG) yatağının istismarı müddətində (1997-ci ilin noyabrından 2015-ci ilin 1 iyununa qədər) ümumi neft hasilatı 368 milyon ton təşkil edib.

Axar.az xəbər verir ki, bu barədə SOCAR-ın geologiya və geofizika üzrə birinci vitse-prezidenti Xoşbəxt Yusifzadə deyib. O, dövr ərzində həmçinin 109 milyard səmt qazının hasil edildiyini də bildirib:

"Blokdan orta günlük neft hasilatı 90 min ton neft və 34 milyon kub metr səmt qazı təşkil edir. AÇG istismarı müddətində Azərbaycan 200 milyon ton mənfəət neft əldə edib.

SOCAR-ın hesablamarına görə, AÇG-də 1 mlrd tona yaxın çıxarıla biləcək neft ehtiyatı var".

Qeyd edək ki, AÇG-nin işlənməsi üzrə müqavilə 20 sentyabr 1994-cü il imzalanıb və həmin ilin dekabrın 12-də qüvvəyə minib. Layihənin iştirakçıları bunlardır: BP (35,78% – operator), ABŞ-ın Chevron (11,27%), ExxonMobil (8,0006%), Hindistanın ONGC Videsh Limited (2,72%), Yaponiyanın Inpex (10,96%), Itochu (4,3%), Azərbaycanın SOCAR (11,65%), Norveçin Statoil (8,56%), Türkiyənin TPAO (6,75%) şirkətləri.