Mütəxəssis və investorların ümumi yanaşması ondan ibarətdir ki, FES faiz artımı ilə bağlı hər hansı qərar verməyəcək.

Bu barədə Axar.az-a açıqlamasında iqtisadçı ekspert Rəşad Həsənov deyib.

İqtisadçı eyni zamanda, faizlərin azaldılması ehtimalının da aşağı olduğunu bildirib:

"Hazırda valyuta bazarlarında stabillik hiss edilməkdədir. Xüsusilə də ABŞ iqtisadiyyatına daxil olan müəyyən göstəricilər - işsizlik səviyyəsinin minimum həddə qədər azalması kimi müsbət simptomlar, həmçinin, infilyasiya səviyyəsinin gözlənilən hədəflərin aşağısında olması prosesdə bir balans yaradır. Bu isə FES üzvlərinin mart toplantısında hər hansı dəyişikliklə bağlı qərar qəbul etməyəcəyi ehtimalını gücləndirir. Yəni FES-in qərarı dolların məzənnəsinə ciddi təsir göstərməyəcək. Hətta bu toplantıdan sonra dolların məzənnəsində kiçik faizlərlə azalmalar müşahidə ediləcək".

Qeyd edək ki, martın 15-də ABŞ-da Federal Ehtiyatlar Sisteminin (FES) növbəti toplantısı olacaq.